Kámara di Komèrsio ta buskando empresanan i organisashonnan nobo na Boneiru ku ke optené un sertifikashon di Blue Destination. Empresanan i organisashonnan ta hunga un ròl aktivo i importante pa hasi Boneiru mas sostenibel, mas salú i mas seif.

Riba djaweps 12 di mei último tabatin un reunion ku Kámara di Komèrsio a organisá pa empresanan i organisashonnan ku a risibí e sertifikashon di Blue Destination. Na nòmber di e organisashon Green Destination, Kámara di Komèrsio ta motivá i duna guia na empresanan i organisashonnan pa optené un sertifikashon di Travel Program / Blue Destination.

Green Destination ta hasi uso di un kantidat di kriterio ku Konseho Mundial pa Turismo Sostenibel (Global Sustainable Tourism Council – GSTC) a rekonosé pa midi, monitoriá i mehorá e maneho i atministrashon di destinashonnan i regionnan. E normanan mundial akí pa biahamentu i turismo sostenibel ta konektá tambe ku e Metanan Sostenibel di Desaroyo (Sustainable Development Goals –SDG’s). Pa e sertifikashon di Blue Destination a añadí un sèt apart di kriterio spesífikamente pa Boneiru.

Delfins Beach Resort, Divi Flamingo Resort, VIP Diving, Dive Friends, Sunbelt Realty, Red Palm Village, Villa Carina Apartments, Captain’s Don Habitat, Harbour Village Beach, B&B Kas Chuchubi i Cultural Park Mangazina di Rei ya kaba ta den poseshon di un sertifikado di Blue Destination. Aktualmente tin otro empresanan i organisashonnan ku ta kanando e trayekto di sertifikashon. Kámara di Komèrsio ta aploudí esaki i gustosamente ke mira mas empresario i organisashon ku ta sigui e inisiativa akí.

Durante e reunion e empresanan i organisashonnan a kompartí nan ideanan i espektativanan ku otro i ku Kámara di Komèrsio. Na e momentu ei a papia tambe tokante kon Kámara di Komèrsio por duna sosten na mas empresa i organisashon pa optené un sertifikado di Blue Destination. Kámara di Komèrsio ta bai traha riba e sugerensianan akí i tin intenshon pa bai stimulá e sertifikashon di Blue Destination den un forma mas aktivo, di manera ku mas empresa i organisashon por aportá na un Boneiru mas sostenibel.

Aktualmente a desaroyá kriterio pa sertifikashon di Blue Destination pa bar, restorant, kompania di hür outo i ofisina tambe i nan ta disponibel. Pa e motibu akí Kámara di Komèrsio Boneiru ta invitá e sektornan akí tambe pa tuma kontakto ku Kámara di Komèrsio pa kuminsá ku e trayekto akí. Mas informashon tokante e bentahanan di sertifikashon di Blue Destination ta optenibel riba www.bluedestination.com òf riba Facebook di Bonaire Blue Destination.

Empresanan i organisashonnan por mèldu nan mes pa sertifikashon di Blue Destination na Kámara di Komèrsio Boneiru na number di telefòn 717 – 5595 òf nan por manda un email na bis@kvkbonaire.com