Maduro & Curiel’s Bank (Bonaire) N.V. (MCB) a risibí un sertifikado i un premio (award) for di man di Diputado Hennyson Thielman i representantenan di e grupo di direkshon di Blue Destination riba 22 di yüli último. Esaki ta nifiká ku MCB den su maneho di empresa ta empeñá partikularmente riba tereno di durabilidat i ku esaki a logra di atkirí un total di 4 strea. Na e momentu akí tin un total di 11 empresa ku a haña un sertifikado di Blue Destination. E empresanan akí ta un ehèmpel i inspirashon pa e otro empresanan riba e tereno akí. Ademas tin algun empresa ku ta den e proseso di sertifikashon. Pronto lo anunsiá esakinan.

E sertifikashon akí di empresanan ta un inisiativa komun di e grupo di direkshon di Blue Destination, Entidat Públiko Bonaire i Good Travel Guide. Kámara di Komersio ta fungi komo e ofisina di frente pa e sertifikashon i e funshon di ouditor ta den man di Good Travel Guide komo partido imparsial.

E sertifikashon tin hopi benefisio pa empresanan, entre otro transparensia. E empresanan por demonstrá nan klientenan e aspektonan ku nan ta bon aden. Empresanan sertifiká ta usa por ehèmpel 19% ménos awa, 24% ménos shushi i 10% ménos CO2. Esaki ta krea un ekonomisashon direkto riba e aspektonan akí. Empresanan sertifiká ku esaki ta haña mihó klasifikashon di nan klientenan. Pues esaki ta trese kuné mas kliente satisfecho i un skor mas haltu. Finalmente ta registrá e empresanan tambe riba e wèpsait di Blue Destination, Good Travel Guide i denter di poko tambe riba otro wèpsait (e.o. Sustainable First). Ku sertifikashon un empresa por demonstrá ku e ta kumpli ku e normanan di un sertifikashon independiente pa maneho di empresa duradero.

E ‘Virus Aware Seal’ ta un “add-on” di e sertifikashon Blue Destination. E sertifikashon èkstra akí ta amplia e kriterio pa “Health and Safety”. ‘Virus Aware Seal’ ta sòru ku e empresa ta mantené su mes na tur regla bálido komo konsekuensia di COVID-19 i otro aspektonan di ‘Health and Safety’. Un ouditor independiente a stipulá durante di e kontrol ku e medidanan di prekoushon akí tabata na vigor. MCB pa esaki a skor 94% pues ta tambe sertifiká ‘Virus Aware Seal’. Pa e sertifikashon akí tambe e empresanan ta risibí un blachi di skor pa e medidanan tumá i pa e protokòlnan di e empresa pa baha e riesgo di traspaso di e vírus.

E blachi di skor di e empresanan sertifiká ta disponibel riba www.bluedestination.com, meskos ku e blachi di skor ku ta públikamente disponibel. E temanan ku skor pe ta: Purchasing and sales, Social well-being & local employment, prevention of exploitation, Health & Safety, Accessibility, Energy & Climate, Waste water, Prevention of pollution & nuisance, ‘Nature, scenery & Green zones’, Cultural Heritage, Public reporting of sustainability. Nos ta invitá bo pa bai wak e blachi di skor di MCB riba e wèpsait di Blue Destination.

Un felisitashon na MCB ku e logro grandi akí i ku esaki nan ta fungi komo un ehèmpel pa otro ofisina ku ke kontribuí na durabilidat di Boneiru. Tur tipo di empresa, grandi òf chikitu por hunga un papel den esaki. Bishitá e wèpsait di Bonaire Blue Destination pa tur e blachinan di skor di e empresanan sertifiká. Aki tin tambe un indikashon di e gastunan pa empresa. Registrashon pa e trayekto di sertifikashon ta posibel via: info@bluedestination.com