Kámara di Komèrsio ta sumamente orguyoso di e empresanan ku a risibí sertifikashon nobo di Blue Destination

Riba djaweps 4 di mei durante TCB su ‘Tourism After 5’, Kámara di Komèrsio i Industria Boneiru huntu ku diputado Jolinda Craane, responsabel pa desaroyo ekonómiko, a hasi entrega di tres sertifikado di Blue Blue Destination. Kámara di Komèrsio kordialmente ta felisitá VIP Diving, Tourism Corporation Bonaire (TCB) i Bonaire Hotel and Tourism Association (BONHATA) ku e éksito ku nan a logra i ta ekspresá e deseo ku nan lo ta un ehèmpel pa otro empresanan.

VIP Diving tabata sa di optené e sinku streanan máksimo. For di aña 2020 VIP Diving tabata sertifiká ku tres strea, loke e tempu ei tabata e kantidat máksimo di strea ku por a logra. For di aña 2022 a amplia e programa di sertifkashon di Blue Destination te na un máksimo di sinku strea. Sostenibilidat for di e promé dia tabata un parti importante di e vishon di VIP Diving, loke ta keda altamente apresiá. Na e momentu akí VIP Diving ta e úniko skol di buseo ku a optené e sinku streanan máksimo di e sertifikashon di Blue Destination.

Banda di esaki TCB a keda sertifiká ku dos strea. TCB ta un di e partnernan stratégiko di Sertifikashon Blue Destination i ta hunga un ròl importante den stimulashon di desaroyo sosial ekonómiko di Boneiru pa medio di turismo sostenibel.
Bonaire Hotel and Tourism Association (BONHATA) tambe a optené dos strea di e sertifikashon di Blue Destination. Tantu nos gobièrnu lokal komo gobièrnu nashonal i Caribbean Hotel & Tourism Association (CHTA) a rekonosé Bonhata komo e asosiashon ofisial di hotèl i turismo di Boneiru. Bonhata tambe ta un di e partnernan stratégiko di Sertifikashon Blue Destination i ta kana desenas di aña dilanti den industria di turismo di nos isla.

Kada empresa na Boneiru, grandi òf chikitu, por hunga un ròl aktivo pa loke ta trata sostenibilisashon. Pensa por ehèmpel riba eskohonan konsiente di medio ambiente, prosesamentu di shushi òf uso di awa. Sòru bon pa personal, informá i konsientisá kliente òf sòru pa un ambiente seif i limpi ta kontribuí na Boneiru komo Blue Destination. A desaroyá e ‘Sertifikashon Blue Destination’ pa informá, guia i rekompensá empresanan i organisashonnan riba nan kaminda pa aktividatnan empresarial mas sostenibel i sosial. Boneiru komo Blue Destination ta aspirá un sinergia perfekto entre naturalesa, kultura i ekonomia. Ta protehá i alabes utilisá e rekursonan natural, manera e oséano ku ta rondoná nos isla. Boneiru komo Blue Destination ta krea un identidat i eksperensia úniko, ku ta distinguí Boneiru for di e otro islanan karibense. Blue Destination ta propagá loke Boneiru ta para p’e i ta yuda atraé bishitantenan ku ta kompartí e balornan akí.

Sertifikashon di empresa ta un inisiativa konhunto di e grupo di direkshon Blue Destination, Entidat Públiko Boneiru i Good Travel Guide. Kámara di Komèrsio ta fungi komo ‘front office’ pa e sertifikashon i Green Destinations komo partido independiente ta ehekutá e ouditoria.