Villa Carina Apartments, Fundashon Mariadal, AB Dive i Greenbikes a kaba di risibí sertifikashon den kuadro di Blue Destination. Riba djárason 25 di yanüari último Kámara di Komèrsio i Industria Boneiru huntu ku diputado Hennyson Thielman di desaroyo ekonómiko, BONHATA i TCB a bishitá e empresanan akí pa hasi entrega di nan sertifikado di Blue Destination. Kámara di Komèrsio kordialmente ta felisitá e kuater organisashonnan akí ku e éksito ku nan a optené i ta ekspresá e speransa ku nan lo ta un ehèmpel pa otro empresanan.

Villa Carina Apartments a logra e máksimo di sinku strea. E risòrt spesial na Belnem akí for di aña 2020 tabata sertifiká kaba ku tres strea, loke e tempu ei tabata e kantidat máksimo ku por a optené. For di aña 2022 a amplia e programa di sertifikashon di Blue Destination te na un máksimo di 5 strea. Te ku awe Villa Carina Apartments ta e úniko empresa ku a logra optené e máksimo di 5 strea akí i un biaha mas ta mustra bon kla ku ta posibel pa kontribuí ku un granito pa un Boneiru sostenibel. Ora ku bo ta hospedá na Villa Carina Apartments, bo sa sigur ku bo ta hasi algu bon pa Boneiru.

Banda di esaki Fundashon Mariadal a risibí sertifikashon di no ménos ku kuater strea. Fundashon Mariadal a strukturá su prosesonan empresarial den un forma sostenibel. Durante e próksimo añanan Fundashon Mariadal lo sigui hasi esaki. Un tim di sostenibilisashon tin ku bai implementá esaki. Sertifikashon di Fundashon Mariadal ta un prueba ku tur tipo di empresá por strukturá nan prosesonan empresarial den un forma sostenibel i di e manera akí duna un aporte aktivo na Boneiru komo Blue Destination.

AB Dive, un divishon di AB Car Rentals, tambe a optené tres strea di e sertifikashon di Blue Destination. Nan ta distinguí nan mes pa medio di sambuyá den grupo chikitu i di e manera ei nan ke kontribuí na preservashon di flora i founa di Boneiru. Nan tin tambe un propio ret di energia riba energia solar i yenamentu di e tankinan di aire tambe ta sosodé na un manera sostenibel. Greenbikes tambe a optené tres strea i nan ta un empresa bastante nobo na Boneiru. Nan ta e promé negoshi di skuter kompletamente eléktriko na nos isla. Di e forma akí nan ta aportá na transporte mas limpi i na redukshon di emishon di CO2.

Kada empresa na Boneiru, grandi òf chikitu, por hunga un ròl aktivo pa loke ta trata sostenibilisashon. Pensa por ehèmpel riba eskohonan konsiente di medio ambiente, prosesamentu di shushi òf uso di awa. Sòru bon pa personal, informá i konsientisá kliente òf sòru pa un ambiente seif i limpi ta kontribuí na Boneiru komo Blue Destination. A desaroyá e ‘Sertifikashon Blue Destination’ pa informá, guia i rekompensá empresanan i organisashonnan riba nan kaminda pa aktividatnan empresarial mas sostenibel i sosial. Boneiru komo Blue Destination ta aspirá un sinergia perfekto entre naturalesa, kultura i ekonomia. Ta protehá i alabes utilisá e rekursonan natural, manera e oséano ku ta rondoná nos isla. Boneiru komo Blue Destination ta krea un identidat i eksperensia úniko, ku ta distinguí Boneiru for di e otro islanan karibense. Blue Destination ta propagá loke Boneiru ta para p’e i ta yuda atraé bishitantenan ku ta kompartí e balornan akí.

Sertifikashon di empresa ta un inisiativa konhunto di e grupo di direkshon Blue Destination, Entidat Públiko Boneiru i Good Travel Guide. Kámara di Komèrsio ta fungi komo ‘front office’ pa e sertifikashon i Green Destinations komo partido independiente ta ehekutá e ouditoria.

Por mira informashon tokante e empresanan sertifiká riba e wèpsait www.bluedestination.com. Dentro di poko Kámara di Komèrsio ta bai organisá un seshon di informashon tokante Sertifikashon Blue Destination atrobe. Si bo ta interesá den esaki òf bo tin otro pregunta, bo por manda un email na info@bluedestination.com òf bo por tuma kontakto ku departamento di BIS di Kámara di Komèrsio Boneiru na 717 – 5595 òf via email bis@kvkbonaire.com.